Ik woj ut vaan de waek is efkes hebbe ovver Coppi. Neh ni Fausto, din Italiaanse Campione oet vervlaoge tieje, bekend beej mennig wielerliefhebber vaan pakweg baove de 70 jaor. Neh ik heb ut ovver ozzen eige Miëterikse Coppi, Pedro genaamd. Aal enne gas jaor en vaste verschiening in ut B-Peloton. Echter de leste waeke duikt heej mit iënige regelmaot op in Gruppetto A. En da neet as opvulling vaan ut illustere gezelschap. Neh, heej deut op bewónderings waardige manier ok zienen duit in ut waalbekende zekske. Afgeloëpe woensdaag nag. Coppi nestelde zich aan de kop vaan ut peloton en ut tempo ging aaldriej nao de 38 kielemèter per oor. De rest vaan de Krukke snapte dur niks va. Aal die jaore haaj heej de ganse meute straol vur de gek, en de schien hoëg gehalde, daat ie ut hoëge tempo beej de A’s neet beej kos biëne. Heej mos waal herrezen zien aas enne jonge God. En reeje kaan zien, ut feit daat heej zich enne neeje racefiets aangeschaft het. En nag ni zonne misselijke ok. Prachtig fietske, um de vingers beej af te lekke en  baovenaal veurzeen vaan aale neejste snufjes op ut gebied vaan techniek en aerodynamica, zoéaas dao zien: Schiefremme, carbon wielkes en ni te vergaete electronisch schakele. Ik heb zelfs vernaome daat heej en frame het, woh en snufje is ingebouwd, daat ut ganse zaakje waat vêring guft as ge ovver ennen hobbelwèg fietst. Puur vur waat extra comfort. Ut mot ni gekker waere. Ma dur zitte ok waat dingskes aan, die ik is goot bekeke heb, en ni gans thoes kaan brenge, o.a. waat getjes, muurkes en waat bedekkende afdekpletjes op plaatse waat ik beej andere fietskes nag noeits gezi heb. Bitje vaag allemaol. Ut zal toch ni zoë zien daat ie en meuterke….Neh, daat geluüf ik ni.

Ma, ik heb dur is en paar portrette vaan afgetrokke (foto’s gemaakt, dus) die ik efkes beejgevoegd heb. Kiek ma is good nao de umcirkelde plaatse (foto 1 en 2). Misschien daat geej ut antwoord op dit serieuze vraogstuk hèt.

Ma zien ongekende krachte kunne natuurlijk ok veurtkome oet ut feit daat ie de leste tied mennig extra trainingskielemèters maakt mit dochterlief, die de liefde vur de fiets ok gevonge hèt. Deze dame reejt zelfs jeugdwedstrijdjes. En dao motte toch fleenk waat trainingskielemèters vur make, umdaat peloton te kunne volge. En zoë aas ut enne gojje vader betaamd, steunt heej ze heer in en draagt zoë zien stiëntje beej. En zoë sneejt ut mès aan twië kante.

Verder de rit vaan zondaag. Ik waas zelf ni vaan de parteej, ma de A-boys haaje dun tocht richting Grefrath en Hinsbeck. Heuveltje op, heuveltje af. Nai Kee, deen de route oetgezatte haaj, waas  dur fleenk mit de zweep ovverhingegao. Sommige haaje daodoor en fleenk jeske oetgedao. Ware hiëlemaol nao de kloëte. Ik schrok meej daanok kapot,  toen ik op zondaag in de vroege middag en foto vaan dun Butcher toegesteurd kreeg beej de kofferbak vaan ziene luuxwage. Ik haaj miene laesbreel ni op, dus toen ik die foto’s onder oëge kreeg, mende ik in di kofferbak iën vaan de Krukke te herkenne (wie?….daat hald ik vur meejzelf),  echter toen ik nao ennen tiëd mien loeriëzer gevonge haaj, kos ik opgelucht ojjem hale en zog daat heej mien half verke gehaald haaj um kloar te make vur in dun diepvries te goeje, zoëdaat beej os eindelijk ut barbeque seizoen kaan beginne.