Blog

Bericht vaan ’t Boorebroedspaar – leste blog

Beste Meulewiekers en Meulewiekinnekes,

Ondertusse is de carnaval alwer een paar daag geleeje. Waat hebbe weej enne onvergetelijke tiëd gehad, same met os ganse gezelschap. Weej hebbe genaote ván ‘t begin wies ’t end!
Toen Twan ôs in september vraog um boorebroedspaar te waere, leek ‘t allemaol zoë ver weg. Weej lefde d’r hiël erg nar toe. ‘t Is zoë snel umgevloage, want nou is ‘t helaas alwer gedoan.
Weej wille iederien bedanke die nar ozze brulluft is gekome en d’r same met ôs zo’n geweldig fiëst ván hebbe gemaakt! ‘t Waas fantastisch!

 

‘t Boorebroedspaar

Niels en Marieke


Bericht vaan ’t Boorebroedspaar - blog 3

Zoaterdaag 9 fibberwari is ‘t daan eindelijk bijna zoë wiet! Merge, zondaag 10 fibberwari, moge weej os bekend goan make. Al hiel veul minse sproake os d’r al weake op aan. Zeej wiste ‘t zeker dat weej ’t zuije weare. Vural nou noa ut leste filmke op facebook woort ‘t wal hiel duudelik. Niels mos ‘s oaves nag met ‘t JCM noa de recepsie vaan de Melderse en America, ma zeej heele zich gelukkig rustig en stelde ni al te vul vroage.

Ok beej Niels zien thoes dochte ze ‘t zeker te wiete. Zondaagmerge kreege we ‘n appje of wej soep kwoame eate. Weej doar same nar toe gegoan.

Misschien daat ze nag ginge twiefele, umdaat normaal gesproake ‘t broedspaar en ‘t gezelschap same goan eate vurdaat ’t verloëvingsbal begint. Maar daat mocht ni baate, ze ware neet van de wiës af te brenge.

Ienmoal in de zaal waar d’r ‘n prachtige circusact! Weej stonge gewoen in de zaal toe te kieke hoe ‘t gezelschap oetkwoam. Ok werd Niels tussendoor oet de zaal gehaald in de act. Maar doar woort gezag dat heej ‘t toch vul te druk zuij hebbe bej JCM en toen mocht heej wer de bühne afgoan. Beej de leste act woort ‘t toch bekend gemaakt daat weej ‘t neeje boorebroedspaar van 2019 zien. Hèhè eindelijk hofde we ’t neet meer geheim te halde!

‘t Klikte metien met ‘t ganse gezelschap en heejdoor hebbe weej d’r met zien allen en geweldig fiëst vaan gemaakt! Weej hebbe d’r ontzettend vaan genoate!

Doarnoa ginge we natuurlijk eier eate bej os thoes. Ok daat waas nag super gezellig, met hiel veul dank aan de organisatie die alles in goije bane hed geleid!

We woorte nag verrast door de Superhilden Eddy en René, die nog efkes un live optreeje kwame geave. Zoe bleef ‘t gezellig tot in de late urkes!

Wej verheuge os nou al op alle andere activiteite! En hoapelik zeen weej jullie allemoal op ozze brulluft op carnavalsdeensdaag 5 márt.

 

’t Boorebroedspaar Niels & Marieke


Bericht vaan ’t Boorebroedspaar – blog 2

Nog een paar daag en dan is het zoë ver!

Ut begint d’r nou um te spanne! Wat zal d’r allemoal op os af goan kome? Ozze kop zit nou vol met allemoal praktische vroage ovver ut eier eate… Wie zurgt d’r vur wat? Hoeveul van alles motte we hebbe? Ok zien weej hiel neejsgierig noa ut gezelschap dat os giet ondersteune en dat d’r samen met os un flink fiëst vaan giët make…

Maar ‘t aller moeilijkste op dit moment is ‘t um os neet te verroaje. Want hoe dichterbeej de carnaval kumt, hoe mier meense zich d’r mej bezig goan halde, woardoar d’r steeds mier vroage kome…

Weej hebbe d’r ontiegelijk vul zin in en zien hiel enthousiast! Daat maakt ‘t extra moeilijk um ‘t geheim te halde. Weej kieke d’r noa oet um os te goan verloëve en d’r met z’n alle un schon fiëstje vaan te goan make!


Bericht vaan ’t Boorebroedspaar – blog 1

Op enne oavend in september ging d’n telefoon,

Twan belde op. Heej vroag of ik allien thoes waas en of ik kos proate. Det waas ’t geval en toen vroag ie toch of weej ’t neeje boorebroedspaar van 2019 wojje weare. Ik wis efkes neet hoe ik mos reagere en vond ’t hielemoal geweldig! Ik haj ien probleem, ik waas dus echt allien thoes en kos dus neet overlegge met mien vriendin. Weej sproake af dat ik heej oaver terug zuij belle.

Mien vriendin kos ik neet bereike, dus doa zoat ik allien op de bank te prakkezere. Toen ze thoes kwoam loag ik al in bed. Toen ze boave kwaam, waas ’t ierste waat ik zei: ik heb vaanoavend un telefoontje gehad, ze vroage of weej ’t boorebroedspaar wille weare! D’r ierste reactie waas: ECHT WOAR??? Geej hed toch wal JOA gezag??!! Neh dus, ik woj ’t natuurlijk efkes ierst met ow overlegge.

Maar ’t antwoord waas natuurlijk wal duudelik, weej goan ’t doan! Weej wer na onder en doar hebbe weej d’r al same enne op gedronke. Natuurlijk allien nog ma doa oaver geproat. Waat zulle ze van os verwachte? Wie zal d’r in ’t gezelschap zitte? Waat motte we doan um os neet te verroaje? ’s Merges op ’t werk heb ik metien gebeld dat we ’t doan.

Vervolgens krege we enne mail met datums en waat d’r allemoal stiet te gebeure. Tja, hoe godde zoiets op het werk regele, giet dan doar ow hin.

De ierste activiteit waas de klier koepe. In november zien we noa Blierick gereeje. Doar werde weej ontvange met koffie, thiej en un kukske. De broedegom mos toen nar boave um klier oet te zeuke en de broed kos onder blieve. Noa mierdere jurkjes en pakke gepast te hebb, alles gewikt en gewoage te hebbe, kieze we un rok of un jurk, unne hood of un pet en vur welke kleur goan we, hajje we dan toch un keuze kunne make. Unne hiele zurg veel van os af, weej zien d’r kloar vur! Toen we na hoes ginge, krege we un lekkere fles drank mej um same op te dreenke.

Ma nou motte we toch nog effe wachte en ut good zeen te verzwiege!

In december ginge we foto’s knippe. Noa os ’s merges gedoucht en opgetut te hebbe gingen we noa un geheime locatie woa we Eddy en Linda ontmoette. Doa moste we os nog in os boorebrulluftsklier heisse, want die koste we thoes natuurlijk nog neet aandoan. D’n broedegom waas bijna kloar toen we d’r achter kwaame daat heej de manchetteknuup vergeate waas. Sloetspelde brachte de oplossing, want det zidde toch ni op de foto. Vervolgens ginge we noa de locatie woar de foto’s geknipt werde. Linda zurgde d’r vur det os klier good zoate, zodat we netjes op de foto stonge. Af en toe kwoame d’r niks vermoedende wandelaars langs en moste weej os snel verstoppe of onder enne paraplu goan stoan, zodat ze os ni herkende. Daat waas toch wal hier spannend!

Weej zien d’r nou dus hielemol kloar vur en kunne bijna ni wachte tot ’t zoe wiet is!! Hopelijk hebbe jullie d’r ok veul zin in, zodat we d’r op os verloëvingsfiëst same un schon fiëstje vaan kunne make!