Mit neeje veurnemens. Iën daovaan is natuurlijk, daat we mit z’n alle veilig ovver

’s Limburgs wegen en ver daoboête os kilomaeters moge make. En ander iets, waat vurrig jaor is blieve ligge, de verslage ovver de Krukkecapriolen op de zondaagmerge, in ’t Krentje. Vur sommige ervaren aas en gemis, is meej ter oëre gekome. Ennen andere bliej daat ie dur vanaf waas, vermoed ik. Evvel, ut waas ok en item op de jaorvergadering, 2 waeke trug. Durrum, dit ma wer is opgepakt en haopelijk kaan ik de andere schrievers heermej ok triggere, ur beejdrage ut komende seizoen te wille levere. (Laes: Obelisk, De Piraat, Jerommeke, Kami Kaze en El Coyote, allemaol gerenommeerde schrievers, bin ik nag iemes vergaete? Ma zeker ok andere. Schroom ow ni in ow creativiteit en kroep in de pen).

Allèz da. De waersveuroetzichte ware en bitje twiefelechtig op zondaagmerge. Ma um half 10 waas ut daan toch drueg. Massaal ware de Krukke en 1 Krukkin op kome drave, vur en tourke.

De A’s ware mit 14. Dur waas dur iëne beej mit waal verrekes fies broen biën. Ozzen Herbie, de ganse weenter op trainingskamp gewest in ut zonnige Zuid Spanje. Nao en klein oetstapje vurrig jaor nao de B’s, wer trug in de gelederen vaan de A’s.

Woh we hin ginge, waas ni gecommuniceerd, ma ut woord oeteindelijk en rundje in de buurt, oetgezatte door El Coyote.

De B’s ware ok mit en respectabel aantal op kome drave, vur en rundje Bridge to Bridge, vaan Well tot aan de Stad. Iën vaan de aanwezige B’s waas Sneaky Franky. Dit jaor giët ie same mit 17 andere leeje vaan ut gemèngd koër Meriko, waovaan nag 2 andere Krukke, Dr. Jekyll en de Raodrunner, dun Alpe d’Huez beklumme op 1 juni. Dit alles vur ut gojje doel. Toen ik op deze zondaagmerge beej Cafe Kleuskens aankwaom, veel meej gelijk zien neej fietske op. En prachtig blauw snelheidsmonster vaan ut Spaanse merk Mendiz. Ik heb dur daan ok en vol vertrouwen in, daat ut mit dit kaarke en zien eige doorzettingsvermoge vur Franky en peuleschilletje mot waere op 1 juni. Trouwes, daat wil ik ok nag waal ff extra vermelde. Komende zaoterdaag 25 maart, is dur heer in de zaal en benefietconcert vur Alpe d’Huzes mit optredens vaan 2 gerenommeerde bands en Dj’s oet de Miëterik en oet de Melderse (Uh…en gen kwöj wôrd ovver de Melderse). Komt daat zeen, komt daat zeen. En schon stukske muziek, onder ut genot vaan en lekker pilske. Zoë steunde ok nag efkes ut gojje doel.

O, ja op zon iërste rit in ut seizoen maakte ok wer en prötje mit de verschillende leeje. Zoë kwaom ik mit de Viëarts aan de praot. Heej is ok noeit te beroerd um iets te doon vur ut Gojje Doel. Heej vertelde meej, daat ie mit zien vrinde vaan de Rotary, op deze zondaagmiddag en Amuse haaj georganiseerd in ut Gasthoes. Nou bin ik ma vaan eenvoudige afkomst, dus ik froonste meej is de wenkbrauwe en vroog meej af waat en Amuse da waal ni mogde zie. De Viëarts lag meej is haorfijn oet,

daat ut um en “fundraising event (DUS???) mit en benefiet veiling”, handelde.

Oeteindelijk bleek daat ge dao gewoën de portemonneej kos trekke, vur dinste en produkte, ten bate vaan ut gojje doel. Heer kreegde da waat te aete en te dreenke beej. Zò moeilijk hof daat dus ni te zien. Ma, prachtig initiatief, natuurlijk. Iën vaan de kavels, woh ge op kos bieje, waas en roondvlucht olv. ozzen eige Miëterikse Charles Lindbergh, Mo Riis, sinds kort in ut bezit vaan en brevet en en echt vleegmeschien, zoëaas ge op de foto kunt zeen, die heej meej persoënlijk steurde. Mo, is ’s weenters, as de miëste op dun MTB zitte, geregeld op de racefiets vaan de parteej, as we mit en klein gruupke en rundje make. Ma de leste waeke schittert heej door afwezigheid. Ik huurde daat de kavel “Vlucht mit Mo” 600 Euro haaj opgebrocht.

Misschien is ie waal same mit de winnaar per vleegtuug nao de Noorderzon vertrokke. En of ze nag trugkome…..