Enne verrègende zondaagmerge
Zaoterdaagaovund op dun benefietaovund vur Alpe d’Huzes, bezocht door verschillende Krukke, waare de meininge eensgezind. Op zondaagmerge zuj ut fietse waal niks gaeve. Tenminste neet boëte. De waergoden zujje os neet good gezind zien, waas de algemeine verwachting. En pilske extra da nag ma.
Echter iën Kruk weerstond op zondaagmerge waer en weend. Klokslaag half 10 stong de Sjeik beej Ger vur de deur. De Sjeik, heej het zien spaore aas haardloëper ruumschoots verdint, ma is ok aal enkele jaore lid en tevens dun Benjamin vaan ut Krukkepeloton. Beej de aldere Krukke is dur nag steeds haop, daat heej nag waat mier “jongere” kaan verleide, um zich beej de Krukke aan te sloete, want langzamerhand begint ut toch waal, qua laeftied, en belège fietsclubke te waere.
Ma good, daat fietse toch wat anders is aas haardloëpe, daat is um ok waal duudelijk gewaore.
Deze zomer, in juni, giët ie mej mit en stelletje 50 en iëne 60 plusser vaan de Barkruk, op fietsvakantie in de Dolomieten. Dao motte bergreuzen, zoëas de Stelvio, Mortirolo en Gavia bedwonge waere. Heej wil doa evvel as jongste, tusse aal die alde, genne flater slaon. “Dit vereist en intensieve veurbereiding “, mot heej deze zondagmerge gedocht hebbe. Want toen heej de gordiene aan de kant schoof en en raegenachtig landschap zaog, besloot ie toch gewoën enne ronde op de fiets te gaon make. De goesting, zuj dun Bels zegge, waas groët. Ut Krukketenue woord aangetrokke, helmke op, fiets oet de graasj, en de weg op, vur en rundje mit as bestemming de Duitse heuveltjes beej Hinsbeck. Door waer en weend, de elementen trotserend. Dus daat mot, mit deze instelling vaan de zomer zeker goodkome dao in Italië.
De Roadrunner, maakte ok zien kilomaeters, ma zoonder en dröpke raegen, lekker binne op dun hometrainer. Verder bleef ut rustig binne de gelederen. Iederiën bleef en urke langer in bed ligge, nao de nacht woh in de klok verzatte waas.
Um half 1 echter, mende toch 4 Krukke, daat ze en Kwaremontje moste gaon nuttige beej Ger. In de krant vaan zaoterdaag, stong namelijk en foto van Wout van Aert (Foto), daags te vurre winnaar van dun E3 prijs, daat is enne wielerkoers in Vlaanderen. Heej waas te zeen, mit en hiël groët glaas Kwaremont aan de moond, dus daat mos waal goj spul zien en zoë woord enne verrègende zondagmerge toch nag nuttig en verantwoord besteed.