Archief van
Categorie: nieuws

win exclusief wielershirt

win exclusief wielershirt

Afgeloëpe zondaagmiddaag toch ma wer is in de pen geklomme, want we krege alwer de opmerking nao de kop geslingerd, dit kier door Janukula Petrovska, daat dur taegeworrig weinig verslaage verscheene in ’t Krèntje. Janukula, helaas door ongemaak, aal hiël lang neet mier in staat um zich op de fiets, aan te sloete beej ut Krukkepeloton. De spraekwoordelijke derde helft lut ie zoë nou en daan neet aan zich vurbeej gaon. Heej leet zich ontvalle daat ie dur vaan ovvertuugd is, zien rentree ut volgende jaor te gaon make in ut C-peloton.

Gedurende die derde helft, stong Kami Kaze in iëne kiër vanoet ut niks naeve meej. In zien typische houding: Steunend op ut leenkse biën mit enne peuk waat vrèvuls tusse zien luppe, prevelde heej meej waat in ut oer. Heej woj efkes vertelle, daat heej vurrige waek zondaag de Miëterik en ut loënbedrief vaan Giesen Theij haaj behoed vur groëte rampspoed. Op weg nao hoes, nao zien fietsritje en aanvullenden borrel beej Ger, nag ma krèk de Miëterik oet, rechtsaf deun Afhang in, ontwaarde heej ennen bermbrand ter hoëgte vaan de baek en loëds vaan veurnumde loënbedrief. In en reflex kneep ie in de remme en de fiets woort nevve de waeg neergekwakt. Door dur duchtig mit zien fietsschoon, die volgens eige zegge aal 15 jaor alt zien, op te stampe, woorte de vlamme bedwonge, vaan waal, en ik citeer Kami Kaze: “Enne maeter hoëg, mit risico vur eige laeve. Dun Afhang behoed vur groëte catastrofe ”.

Door de aoverige Krukke woord aal gauw geopperd, daat heej ’s merges op dun hinwaeg, zelf dun aanstichter waal zuj zien gewest, nao nag gauw efkes en sigretje te hebbe gepaft, de peuk dao achteloos neergegoeid te hebbe. Ma, de oërzaak waas, volges Kami en aanmaakblökske, waat heej nao nader inspectiewerk haaj gevonge, op de plek des onheils. Aas bewies leet ie en foto zeen op zienen tillefoon. Ma dit bewiesstuk waas, nao eige zegge, neet vur publikatie beschikbaar. Dit haai toch hiël anders af kunne loëpe, desastreus zelfs.  Ut gerucht giët daat ie beej dun burgervader is veurgedrage vur en bedankje, mit beejbehurende medaalie, opgeluusterd door en serenaatje vaan de AMC zengers.

De B’s vertrokke um 9 oor mit en man of 8. Dun Butcher steelde de show, door te verschiene in ut alde shirtje, door de miëste Krukke inmiddels verheven tot poetslap, ma beej dun Butcher leet ut nag aaltied op ut stapelke fietsklier in ziene walk-in closet. Heej haaj de slaop nag ni good oet gehad en ni in de gate, daat ie ut verkierde shirtje haai gegrepe. Dao hebbe we iets op verzonne, ma daoaover later mier. Nou wil ik waal vanalles vertelle aover dun tocht, ma ik koom ni wier as en citaat vaan de Boss: “En biezonder rondje mit 8 B’s.”

De A’s haaje vandaag urren maondelijkse langen tocht. Door de vakantietied, leete veul Krukke verstek gaon. Dun tocht ging de grens aover, mit as letterlijk hoëgtepunt, de verschrikkelijken Oermter berg. Op mien vraog beej vertrek aan de routeplekker, of din nag erger waas aas de Stelvio vaan enne gas waeke trug in Italie, waas zien antwoord bevestigend. Heej waas inderdaad erger. Neet in huügte of stijgingspercentage, ma waal op ut gebied vaan ut asfalt, want daat laog dur aardig beroerd beej.

Ut vertrekkende peloton bestong oet 11 renners. Onder deze 11, iën neej lid. Op dit moment, nag renner onder de naam: “Hij die niet met naam genoemd mag worden”. Simpel, umdaat heej nag genne Krukkenaam het. Op beejgevoegde foto (boven) kunde zeen, welke Miëteriksen inwoëner ut betreft. (As ge um op de foto ni herkend: zien veurletters zien R.B. Roëzeknupper vaan beroep en maakt tevens diël oet vaan Taxi Muijsers). Nou is de inspiratie binne de Krukkegelederen, waat betreft ut verzinne vaan enne gojje naam en bitje op.

Dus rupt ut bestuur ow aas laezer daanok op, um ow hersens is te laote krake en ennen treffende naam te verzinne vur dit neeje lid. Vaanzelfspraekend wuurd dao en prieske taegenaover gezatte. Vur degene din dun beste naam verzint, stelt ut bestuur ut iënige echte alde shirtje vaan dun Butcher beschikbaar, zoëaas gedrage op beejgaonde foto, eventueel nao wens, gesigneerd en zelfs ongewasse, mit zwiëtplek onder de errum, behuurt tot de meugelijkheden. Zoë slaon weej daa wer 2 vleege in iëne klap. R.B. is vurzeen vaan enne Krukkenaam en dun Butcher kaan zich op de zondaagmerge ni mier vergalloperen, en in verkierd shirtje ten tonele te verschiene.

Suggesties insteure vur 10 augustus o.v.v. owe naam en adres nao ut volgende emailadres: info@twcdebarkruk.nl (ovver dun oetslaag kaan neet gecorrespondeerd waere, dao beginne we ni a.)